Voyah Li L9 modelining raqobatchisini taqdim etdi

Xitoyda Voyah Taishan Black Warrior flagman yo‘ltanlamasining sotuvi rasman boshlandi. Model mamlakatda 3-darajali avtopilot tizimi bilan jihozlangan ilk seriyali avtomobil sifatida taqdim etilmoqda. Narxi — $74 ming atrofida.

Modelning asosiy jihati — Huawei Qiankun ADS tizimi bo‘lib, u 4 ta lidar bilan ishlaydi. Old tomda yangi avlod 896-liniyali lidar o‘rnatilgan, yon va orqa qismda esa qo‘shimcha lidarlar mavjud. Umumiy hisobda tizim 30 dan ortiq sensor, kameralar va radarlar bilan jihozlangan. Tizim 300 metr masofagacha obyektlarni aniqlay oladi.

Avtomobil o‘lchamlari 5 230 mm uzunlikda bo‘lib, salon 6 o‘rindiqli (2+2+2) formatda bajarilgan. Black Warrior versiyasi qora rangdagi dizayn, qora disklar va qizil tormoz supportlari bilan ajralib turadi.

Ichki qismda 16,1 dyuymli multimedia ekrani, 10,25 dyuymli raqamli panel va 55 dyuymli AR-HUD proyeksiya tizimi mavjud. Tizim HarmonySpace platformasida ishlaydi va ovoz orqali boshqaruvni qo‘llab-quvvatlaydi.

Audiotizim 32 ta dinamikdan iborat bo‘lib, umumiy quvvati 2 300 Vt. Ikkinchi qatorda alohida iqlim nazorati, sensor boshqaruv paneli, shift monitori va hatto muzlatkich mavjud.

Texnik jihatdan model gibrid tizimga ega: 1,5 litrli motor generator sifatida ishlaydi, asosiy harakatni esa 516 ot kuchiga ega ikki elektromotor ta’minlaydi. Elektrozaxira — 350 km, umumiy yurish masofasi esa 1 400 km dan oshadi.

Avtomobil 800V platformada qurilgan va tezkor zaryadlashni qo‘llab-quvvatlaydi — 20% dan 80% gacha atigi 12 daqiqada.