Xitoyda yangilangan Chery Tiggo 9 tashqi ko‘rinishi namoyish etildi

Yangilangan Chery Tiggo 9 krossoveri premeraga tayyorlanmoqda - avtomobilning birinchi fotosuratlari va texnik ma’lumotlari Xitoy Sanoat vazirligi tomonidan e’lon qilindi.

Model 2023-yilgi debyutidan keyin birinchi marta jiddiy restylingdan o‘tadi: mavjud suratlarga ko‘ra, tashqi ko‘rinishning yangilanishi qayta ishlangan old va orqa qismlarni, L-shaklidagi elementlarga ega yangi yirik faralarni va o‘zgartirilgan bamperlarni o‘z ichiga oladi. Kichik, ammo muhim yangilanishlar qatoriga qanotlarda qo‘shimcha kameralarning paydo bo‘lishi kiradi, bu esa ilg‘or haydash yordamchilarining joriy etilishini ko‘rsatishi mumkin. Orqada - yangi LED chiroqlar va o‘zgartirilgan yukxona eshigi (raqamli belgi bamperga o‘tdi).

Krossover biroz kattaroq bo‘ladi: uzunligi - 4 853 mm (+33 mm), balandligi - 1 718 mm (+8 mm), ammo kengligi va g‘ildirak bazasi o‘zgarmaydi. Salonda avvalgidek besh-yetti o‘rin bo‘ladi.

Yangilangan Tiggo 9 kapoti ostida avvalgi 261 ot kuchiga ega 2 litrli turbomotor bo‘ladi. Transmissiya haqida ma’lumot yo‘q, lekin bu 7 pog‘onali "robot" yoki 8 pog‘onali "avtomat" bo‘ladi. Yuritma - old yoki to‘liq. Rasmdan ko‘rinib turibdiki, aynan to‘liq uzatmali variant sertifikatlangan.